Ta’lim sifatini ta’minlash

Ta’lim sifatini nazorat qilish bo‘limi (Sifat nazorati koordinatorligi) O‘zbekiston Respublikasi Vazirlar Mahkamasining 2017-yil 18-iyuldagi 515-son qaroriga muvofiq tuzilgan va Oliy ta’lim, fan va innovatsiyalar vazirining 2023-yil 27-martdagi 72-son buyrug‘i bilan qayta tashkil etilgan. Universitet tuzilmasida bo‘lim strategik rivojlantirish bo‘yicha birinchi prorektorga bo‘ysunadi va vazirlikning Ta’lim sifatini ta’minlash departamentiga hisobdor.

Bo‘lim o‘quv jarayonining sifatli tashkil etilishini va professor-o‘qituvchilarning dars berish sifatini muntazam tahlil qiladi; talabalar bilimining davlat ta’lim standartlariga muvofiqligini va fanlarni o‘zlashtirish darajasini o‘rganadi; salohiyatli o‘qituvchilarni tanlash va ishga qabul qilishda ishtirok etadi; bilimlarni nazorat qilish va baholashda shaffoflik va xolislikni ta’minlaydi; plagiatga qarshi dasturlarni joriy etadi va ta’lim sifatiga ta’sir etgan omillar bo‘yicha tahliliy ma’lumotlarni rektorga hamda vazirlikka taqdim etadi.

Bo‘lim faoliyatining asosiy maqsadlari: universitet va uning tuzilmalarida ta’lim sifatini oshirish; universitetning milliy va xalqaro reytingini oshirish bo‘yicha ishlarni muvofiqlashtirish; ta’lim sifatining davlat ta’lim standartlariga muvofiqligini ta’minlash; ta’lim jarayonini nazorat qilishning ichki tizimini joriy etish.

Universitetda o‘quv jarayoni 2015-yildan buyon ECTS tamoyillariga asoslangan kredit-modul tizimi bo‘yicha tashkil etilgan.